Ballina Lajme Rast i ri i ngacmimit seksual, viktima nga Zveçani

Rast i ri i ngacmimit seksual, viktima nga Zveçani

0
SHPERNDAJ

Një rast i ri i ngacmimit seksual është raportuar në polici pasditen e së hënës.

Në njoftimin zyrtar për rastin potencohet se viktima një vajzë nga Banja e Zveçanit me kombësi Serbe ka denoncuar shoferin e autobusit për ngacmim.

Policia sqaron se me vendim të prokurorit rasti është hapur ndërsa hetimet janë duke u zhvilluar në procedurë të rregullt.

Gjatë javës janë denoncuar disa raste të ngacmimeve seksuale e abuzimeve.

Rasti i Pejës 

Një person është arrestuar të dielën mbrëma me urdhër të Prokurorisë së Pejës nënë dyshimin se kishte keqpërdorur seksualisht një të mitur të komunitetit Rom. Sipas policisë personi dyshohet se nënë premtimin për martesë e kishte nxitur të miturën të kryente marrëdhënie seksuale.

Personi me urdhër të prokurorisë është paraburgosur.

Më poshtë lexoni dosjet për pjesëtarin e FSK-së të arrestuar dhe Policit të Kosovë  të dyshuar për vepra të tilla.

Dosja për pjesëtarin e FSK-së 

Sipas kërkesës së Prokurorisë për caktimin e masës së paraburgimit të siguruar nga KALLXO.com, më datë 7 shkurt rreth orës 19 në fshatin Mogillë të Komunës së Kllokotit i pandehuri (pjesëtari i FSK-së) për qëllime seksuale ka kapur për dore të miturën dhe e ka futur mbrapa veturës së tij. Më pas ka tentuar ta zhveshë, ndërsa e mitura ka kundërshtuar duke i thënë se “dëshiron të shkoj në shtëpi”.

“Në ato qaste kishte arritur xhaxhai i të miturës dhe e kishte larguar të miturën nga vetura ku më pas ishte larguar për në shtëpinë e saj dhe më pas është detyruar që të kërkoj ndihmë mjekësore psikiatrike në Qendrën Emergjente të Spitalit Regjional në Gjilan”, thuhet në kërkesën e Prokurorisë.

Gjithmonë sipas kërkesës për paraburgim, dy ditë më pas, Prokuroria kishte pranuar një kallëzim penal të në cilin thuhet se pjesëtari i FSK-së, ka keqpërdorur seksualisht një të mitur nën moshën 16 vjeçare.

Dosja për pjesëtarin e policisë 

Ngjarja e cila e tronditi opinion publik në Kosovë dyshohet se fillimisht ndodhi pasi që e mitura kishte shkuar në Polici për ta raportuar ngacmimin seksual nga mësimdhënësi.

Ditë më parë mediat raportuan se viktima e mitur kishte shkuar në polici për të raportuar ngacmimin e mësimdhënësit por që më pas kishte rënë pre e dhunimit dhe keqpërdorimit seksual edhe nga polici.

KALLXO.com, ka dhënë detaje nga dosja e Prokurorisë.

Aty shpjegohet se si polici dyshohet se e ka keqpërdorur pozitën kur viktima e kishte lajmëruar një rast të abuzimit seksual nga një mësues i saj.

Dosja sqaron se i pandehuri më pas kishte shkuar të shkolla, ku nga viktima kishte marrë numrin e saj të telefonit.

Pas këtij veprimi, sipas asaj që shkruhet në dosjen e Prokurorisë, polici ka filluar të komunikojë me të duke e kushtëzuar që nëse nuk del të takohet me të, ky ‘nuk kthehet i gjallë në shtëpi’.

Nga aty, sipas dosjes, i dyshuari kishte shkuar te shtëpia e viktimës, ku pas presioneve me drita të makinës e kishte detyruar të dalë jashtë.

“Me veturën e tij kanë shkuar në motel dhe aty pa dëshirën e të dëmtuarës sipas Prokurorisë i dyshuari e ka detyruar që të ketë marrëdhënie seksuale me të”, thuhet në dosje.

Prokuroria përmend disa raste, ku sipas saj, ishin kryer marrëdhënie seksuale pa dëshirë, përfshirë udhëtimet në Shqipëri si Patok, Tiranë, kalanë e Rozafës, Elbasan etj.

Rasti kishte nisur në vitin 2016, kur viktima ishte 16 vjeçare, ndërsa lidhja thuhet se kishte vazhduar tutje gjatë dy viteve të ardhshme.

Në janar 2019, kur vajza ishte 18 vjeçe ajo kishte kuptuar se ishte shtatzënë në javën e 10-të.

Lajmi për shtatzëninë kishte ngritur në këmbë një aparat të tërë ndërsa termini për abortin dyshohet se ishte caktuar me 15 janar në klinikën e doktorit F.A.

Aty aborti dyshohet se ishte kryer për një shumë prej 230 eurosh.

Statistikat e Policisë 

Vetëm deri më 10 dhjetor të vitit të kaluar, të dhënat e Policisë së Kosovës flasin për 36 raste të dhunimit gjatë vitit 2018. Prej tyre, 7 raste janë të raportuara si dhunime në tentativë.

Ndërsa në vitin 2017, Policia ka thënë se janë shënuar 38 raste të dhunimit, 9 prej të cilave janë dhunim në tentativë.

Numri më i vogël ka qenë në vitin 2016, me 34 raste dhunimi, nga të cilat 6 kanë qenë si dhunim në tentativë.

Ndërsa, për veprën keqpërdorimi seksual i personave nën moshën 16 vjeçare, sipas Policisë së Kosovës, deri më 10 dhjetor të vitit 2018 janë 58 raste.

Në vitin 2017, për të njëjtën vepër të dhënat e Policisë flasin për 61 raste.

Por ky numër ishte për 15 më i lartë më 2016, kur u raportuan 76 raste.

KALLXO.com ka siguruar të dhënat nga Policia e Kosovës edhe për sulmet seksuale.

Shifrat flasin se deri më 10 dhjetor të vitit të kaluar janë 43 sulme seksuale.

Një rast prej tyre është raportuar si sulm seksual në tentativë.

Ndërsa në vitet paraprake, 2017 dhe 2016 të dhënat flasin për 50 raste përkatësisht 56 raste sulme seksuale. Prej tyre, si sulm seksual në tentativë janë regjistruar 1 në vitin 2017 e 3 në vitin 2016.

Në vitin 2018 sipas Policisë së Kosovës ka qenë një rast për nxitje të akteve seksuale me premtim të rrejshëm të martesës. Ndërsa në dy vitet paraprake, të dhënat flasin se janë paraqitur dy raste në vitin 2017 e tri të tjera në vitin 2016.

KALLXO.com ka siguruar të dhënat edhe nga Këshilli Gjyqësor të Kosovës mbi dhunimet dhe ngacmimet seksuale për vitin 2018.

Gjithsej për vitin e kaluar janë pranuar 25 lëndë të llojit dhunim. Ndërsa, janë plot 135 lëndë për dhunim që presin për punë nëpër gjykatat e Kosovës. Prej këtij numri, janë zgjidhur 37 lëndë, ndërsa kanë mbetur edhe 97 lëndë të pazgjidhura.

Sipas të dhënave të gjykatave, vepra sulm  seksual për vitin 2018 janë pranuar 8 lëndë, ndërkaq numri i lëndëve sulm seksual, e që janë në punë është 32.

Në vitin e kaluar nëntë lëndë janë zgjidhur, e në punë kanë mbetur edhe 23 të tjera.

Gjykatat e Kosovës kanë pranuar lëndë edhe për keqpërdorim seksual i personave nën moshën 16 vjeçare.

Sipas të dhënave të KGJK-së, në vitin 2018 janë pranuar 25 lëndë të kësaj natyre, ndërsa gjithsej numri i lëndëve ka arritur në 70.

Gjatë vitit të kaluar, gjykatat kanë zgjidhur 20 lëndë të keqpërdorimit seksual i personave nën moshën 16 vjeçare. Ndërsa, po presin për zgjidhje 50 lëndë të tjera.

Loading...